ಮೈಸೂರು ದಸರಾ ಸಂಭ್ರಮಕ್ಕೆ ಈಗಾಗಲೇ ಸಜ್ಜಾಗಿದೆ. ದಸರಾ ಸಂಭ್ರಮದ ಜತೆಗೆ ಖಾದ್ಯ ಪ್ರಿಯರ ಬಾಯಿ ರುಚಿ ತಣಿಸಲು ಇಲ್ಲಿ ಆಹಾರ ಮೇಳವೂ ನಡೆಯುತ್ತದೆ. ಇದರಲ್ಲಿ ವಿಶೇಷವಾದದ್ದು ಬಂಬೂ ಬಿರಿಯಾನಿ. ಅರೆ….ಇದೇನು ಎಂದು ಹುಬ್ಬೇರಿಸಬೇಡಿ. ದಸರಾದಲ್ಲಿನ ಆಹಾರ ಮೇಳದಲ್ಲಿ ಸೋಲಿಗರು ತಯಾರಿಸುವ ರುಚಿಯಾದ ಬಿರಿಯಾನಿಯೇ ಈ ಬಂಬೂ ಬಿರಿಯಾನಿ.
ಮೈಸೂರಿನ ನಾಗರಹೊಳೆ ಕಾಡಿನಲ್ಲಿರುವ ಸೋಲಿಗರು ಮಾಡುವ ಈ ಬಿರಿಯಾನಿ ಹೆಸರುವಾಸಿಯಾದದ್ದು. ಐದು ವರ್ಷದಿಂದ ಇವರು ಮೈಸೂರು ದಸರಾದ ಆಹಾರ ಮೇಳದಲ್ಲಿ ಬಂಬೂ ಬಿರಿಯಾನಿ ತಯಾರು ಮಾಡುತ್ತಿದ್ದಾರೆ.
ಅಂದ ಹಾಗೇ, ಈ ಬಿರಿಯಾನಿಯ ವಿಶೇಷ ಏನು? ಹೇಗೆ ಮಾಡುವುದು ಎಂದು ಯೋಚಿಸುತ್ತಿದ್ದೀರಾ? ಚಿಂತೆ ಬೇಡ ಮಾಡುವ ವಿಧಾನ ಇಲ್ಲಿದೆ ನೋಡಿ.
ರುಚಿಯಾದ ಈ ಬಂಬೂ ಬಿರಿಯಾನಿಯನ್ನು ಸೋಲಿಗರ ತಂಡ ತಯಾರಿಸುವ ರೀತಿಯೇ ಭಿನ್ನವಾಗಿದೆ. ಮೊದಲಿಗೆ ಟೊಮೆಟೋ, ಈರುಳ್ಳಿ, ಚಕ್ಕೆ, ಲವಂಗ, ಮೆಣಸು, ತೆಂಗಿನಕಾಯಿ, ಹಾಗೂ ಇತರೆ ಮಸಾಲ ಪದಾರ್ಥಗಳನ್ನು ಸೇರಿಸಿ ಘುಂ ಎನ್ನುವ ಮಸಾಲೆಯನ್ನು ಸಿದ್ಧ ಮಾಡಿಟ್ಟುಕೊಳ್ಳುತ್ತಾರೆ.
ಹೆಸರು ಹೇಳುವಂತೆ ಇದಕ್ಕೆ ಬಂಬೂ ಬೇಕೆ ಬೇಕು. ಹಾಗಾಗಿ ಒಂದು ಬಂಬೂ ತೆಗೆದುಕೊಂಡು ಅದಕ್ಕೆ ರುಬ್ಬಿಕೊಂಡ ಮಸಾಲೆ, ಕತ್ತರಿಸಿಟ್ಟುಕೊಂಡ ಕೊತ್ತಂಬರಿ ಸೊಪ್ಪು, ಪಲಾವ್ ಎಲೆ, ನೆನೆಸಿದ ಅಕ್ಕಿಯನ್ನು ಈ ಬಂಬೂವಿನೊಳಗೆ ತುಂಬಿಸುತ್ತಾರೆ. ನಂತರ ಚಿಕನ್ ಅನ್ನು ಶುದ್ಧವಾಗಿ ತೊಳೆದುಕೊಂಡು ಇನ್ನೊಂದು ಬಂಬೂವಿನೊಳಗೆ ಚಿಕನ್ ಹಾಗೂ ಮಸಾಲೆಯನ್ನು ತುಂಬುತ್ತಾರೆ.
ಕೊನೆಗೆ ಈ ಎರಡೂ ಬಂಬೂವನ್ನು ಒಂದು ಗಂಟೆ ಹೊತ್ತು ಬೆಂಕಿಯಲ್ಲಿ ಸುಡುತ್ತಾರೆ. ಚೆನ್ನಾಗಿ ಬೆಂದ ನಂತರ ಇವೆರಡನ್ನು ತೆಗೆದು ಬೆಂದ ಚಿಕನ್ ಹಾಗೂ ಪಲಾವ್ ಎರಡನ್ನು ಚೆನ್ನಾಗಿ ಮಿಶ್ರಣ ಮಾಡಿ ಕೊಡುತ್ತಾರೆ. ಒಮ್ಮೆ ಇದರ ರುಚಿ ನೋಡಿದವರು ಮರುಳಾಗುವುದು ಗ್ಯಾರಂಟಿ. ಇದಕ್ಕೆ ಡಿಮ್ಯಾಂಡ್ ಕೂಡ ಅಷ್ಟೇ ಇದೆ. ಇದರ ಬೆಲೆ 160 ರೂಪಾಯಿ.
ಅತಿಯಾದ ಮದ್ಯಸೇವನೆ ಆರೋಗ್ಯಕ್ಕೆ ಹಾನಿಕರ ಅನ್ನೋದು ಗೊತ್ತೇ ಇದೆ. ಇದರಿಂದ ಲಿವರ್ ಸಿರೋಸಿಸ್ ಕೂಡ ಉಂಟಾಗಬಹುದು. ಮದ್ಯ ಸೇವನೆಯನ್ನು ಹೊರತುಪಡಿಸಿ ಲಿವರ್ ಸಮಸ್ಯೆಗೆ ಕಾರಣವಾಗಬಹುದಾದ ಇತರ ಅಂಶಗಳು ಯಾವುವು ನೋಡೋಣ.
